បណ្ដឹងវីស្សលប្ល៉ូវីង
សេចក្ដីណែនាំស្ដីពីនីតិវិធីនៃការរាយការណ៍បណ្ដឹងវីស្សលប្ល៉ូវីង
គណៈគ្រប់គ្រងជាន់ខ្ពស់របស់គ្រឹះស្ថាន អិល ប៊ី ភី មីក្រូហិរញ្ញវត្ថុ ភីអិលស៊ី សូមណែនាំ និងជូនដំណឹងដល់បុគ្គលិកគ្រប់កម្រិតទាំងអស់ អំពី “នីតិវិធីនៃការរាយការណ៍បណ្ដឹងវីស្សលប្ល៉ូវីង” ដូចខាងក្រោម៖
នីតិវិធី និងមធ្យោបាយនៃការរាយការណ៏
បុគ្គលិកអាចរាយការណ៍ពីការព្រួយបារម្ភរបស់ខ្លួន ឬសកម្មភាពមិនប្រក្រតី ឬភាពអសកម្មណាមួយដែលខ្លួនបានដឹងមកកាន់គណៈកម្មការវីស្សលប្ល៉ូវីង ដើម្បីដោះស្រាយ និងចាត់វិធានការណាមួយចំពោះបុគ្គលិកដែលជាជនបង្កតាមរយៈនីតិវិធី និងមធ្យោយណាមួយដូចខាងក្រោម៖
- នីតិវិធីទី១: ការរាយការណ៍ដាក់ក្នុងប្រអប់សំបុត្រជាលាយលក្ខណ៍អក្សរ តាមរយៈទម្រង់ដែលបានភ្ជាប់ជូនក្នុង QR code នៃសេចក្ដីណែនាំនេះ ឬសរសេរជាលិខិតទូទៅតាមដែលអាចធ្វើបាន ។
- នីតិវិធីទី២: ការរាយការណ៍មកកាន់គណៈកម្មការវីស្សលប្ល៉ូវីង តាមរយៈ
- ដោយផ្ទាល់មាត់ : មន្រ្តីប្រតិបត្តិតាម
- ទំនាក់ទំនងទូរសព្ទ : មន្រ្តីប្រតិបត្តិតាម
- ផ្ញើសារតាមរយៈ : (Telegram) ដូចមានភ្ជាប់ជូនក្នុង QR code ខាងក្រោម
- ផ្ញើសារអ៊ីមែល : compliance@lbpmicrofinance.com.kh
- អ្នករាយការណ៍ ឬអ្នកប្តឹង ៖ បុគ្គលិកគ្រប់កម្រិតទាំងអស់នៅក្នុងគ្រឹះស្ថាន មានសិទ្ធិរាយការណ៍ពីសកម្មភាពមិនប្រក្រតីនានា ឬភាពអសកម្មគ្រប់រូបភាព ឬវិវាទណាមួយ ដូចមានចែងនៅក្នុងចំណុច៤ នៃគោលការណ៍ វីស្សលប្ល៉ូវីង ដែលអាចនឹងកើតឡើងនៅក្នុងគ្រឹះស្ថាន ។ ហើយបុគ្គលិកទាំងអស់ត្រូវអនុវត្តនីតិវិធីដូចបានរៀបរាប់ខាងលើ និងដូចមានចែងក្នុង ចំណុច៥.១ នៃគោលការណ៍ វីស្សលប្ល៉ូវីង និងអាចប្រើប្រាស់ទម្រង់រាយការណ៍ដោយចូលទៅទាញយកតាមរយៈ QR code ដូចមានភ្ជាប់ជូនក្នុងសេចក្ដីណែនាំនេះ ឬតាមទម្រង់ទូទៅតាមការសម្រេចចិត្តរបស់អ្នករាយការណ៍ ។
- គណៈកម្មការដោះស្រាយបណ្តឹងវីស្សលប្ល៉ូវីង៖ នៅពេលទទួលបានពាក្យបណ្តឹងតាមរយៈការបើកប្រអប់សំបុត្រ គណៈកម្មការដោះស្រាយបណ្តឹងវីស្សលប្ល៉ូវីង នឹងធ្វើការស៊ើបអង្កេត សាកសួរពីព័ត៌មាន កត់ត្រាឱ្យបានលម្អិត ដើម្បីដោះស្រាយព្រមទាំងរក្សាការសម្ងាត់ដល់អ្នករាយការណ៍ឱ្យបានល្អបំផុត និងធានាថាគ្មានផលប៉ះពាល់ណាមួយដល់អ្នករាយការណ៍ឡើយ ។ ក្នុងករណីគណៈកម្មការដោះស្រាយបណ្តឹងវីស្សលប្ល៉ូវីង មិនអាចដោះស្រាយបញ្ហានេះបាន ត្រូវបញ្ជូនបន្តទៅក្រុមប្រឹក្សាភិបាល ។
- ការស៊ើបអង្កេត និងដោះស្រាយវិវាទ៖ បន្ទាប់ពីទទួលបានបណ្តឹងវីស្សលប្ល៉ូវីង គណៈកម្មការដោះស្រាយបណ្តឹងវីស្សលប្ល៉ូវីង នឹងចាត់តាំងអ្នកតំណាងក្នុងការស៊ើបអង្កេតដើម្បីប្រមូលព័ត៌មានភស្តុតាងឱ្យបាន គ្រប់គ្រាន់ និងច្បាស់លាស់។ បន្ទាប់មកគណៈកម្មការដោះស្រាយបណ្តឹងវីស្សលប្ល៉ូវីង នឹងបើកកិច្ចប្រជុំពិនិត្យ និងពិភាក្សាសម្រេច ដើម្បីជូនដំណឹងដល់អ្នករាយការណ៍ក្នុងរយៈពេល០៥(ប្រាំថ្ងៃ) ឬជូនដំណឹងដល់អ្នករាយការណ៍ក្នុងរយៈពេលកំណត់ជាក់លាក់ណាមួយនៃថ្ងៃធ្វើការ ។ ក្នុងករណីសមាជិកនៃគណៈ កម្មការមានជាប់ពាក់ព័ន្ធនឹងការរាយការណ៍សមាជិកនោះ នឹងមិនត្រូវចាត់តាំងឱ្យចូលរួមការប្រជុំពិនិត្យ និងពិភាក្សានេះទេ ។
កំណត់សម្គាល់
- ចំពោះអ្នករាយការណ៍ដែលមានបំណងមិនឱ្យដឹងពីអត្តសញ្ញាណសូមរាយការណ៍ជាអនាមិក ។
- ចំពោះបុគ្គលិកដែលមិនមានបំណងលាក់ពីអត្តសញ្ញាណទេ សូមជ្រើសរើសវិធីសាស្រ្តណាមួយក៏បានដែលខ្លួនពេញចិត្តរាយការណ៍ ។
- អ្នករាយការណ៍ មុននឹងសម្រេចចិត្តរាយការណ៍ត្រូវមានភស្តុតាង (ឧ. មានសាក្សី ឯកសារ សារសំឡេង មានការថតរូបជាដើម។ល។) ជៀសវាងមានការភ័ន្តច្រឡំ ។
- បុគ្គលិកទាំងអស់អាចសរសេរសំបុត្របណ្តឹងជាអនាមិកដោយខ្លួនឯងបាន ឬប្រើប្រាស់ទម្រង់នៃរាយការណ៍វីស្សលប្ល៉ូវីង ដែលអាចចូលទាញយកតាមរយៈតំណភ្ជាប់ជូនក្នុង QR code នៃសេចក្ដីណែនាំនេះ ។